الوحده ..اول يوم في 2013

ممكن قد ايه تكون قاسيه وممكن قد ايه تكون طوق بيخنق صاحبها عارف امتي لما بيقع في شده ويبص يلاقي نفسه لوحده ومش عارف يتصرف او لما يلاقي نفسه في زحمه ويلاقي كل الناس اعده تكلم بعض وهو لوحده اعد ساكت يبص للارض يقول هما كل الناس دول استكروا علي ان يكون معايا واحد او واحده بس

الوحده تحسها لما تكون عايز تاخد قرار وانت مش عارف ايه الصح من الغلط وتكون عايز تفكر مع حد بصوت عالي تحسها وانت مش عارف فلان ده اتصرف كده طبيعي ولا وحش وانت مش عارف تحدد لانك في المشهد

الوحده لما تحس ان وحش كاسر بيقرب عليك وانت مش عارف تصده وعايز تقول لحد جنبك تعالي اقف في وشه جنبي علي الاقل هتقويني ...الوحده تحسها وانت رايح تحجز حاجة ويقلك انت لوحدك تقوله ايوه لوحدي فيبصلك نظرة شفقه ..الوحده لما تكون مطر انك تقول للي قدامك ايوة انا وحيد مليش حد عايز حاجة بتكون بتموت من جوه

الوحده لما تكون غريب يعني لا لك قريب لا جار ولا اي حد ايه ده هو كده ازاي ..الوحده لما يكون اهلك قننوا علاقتكم بكل الناس ممكن يكونوا وجهة نظرهم صح وممكن يكونوا كانوا ناس فعلا ميستحقوش اننا نعرفهم بس نتيجة واحده اني لوحدي

طيب الصحاب هما بعدوا انا مبعدتهمش فضلت اقرب وهما مقربوش والدنيا لخمتهم كل واحد اندمج في حياته وممكن نقول كل واحد بقا في بلد كل صحابك كده ايون لاني مقدرش اجي علي نفسي عشان حد مش حاسه بيحبني وانا محستش ان حد حبني ...

طيب واهلك برضه سيبنك لوحدك لا موجودين وبيعملوا اللي في ايدهم وزياده بس مش هما الحل

طيب صحابك في الشغل لازم في ناس اقلك مش هي ديه صداقه دايما علاقه الشغل علاقه مقننة لاني لما فتحتلهم قلبي خانوك واللي يخون مرة يخون الف مرة لانها علاقه مبينه علي مصلحة الشخص وعمره ماهيمه مصلحتك بس بيفضل في ناس منهم انت بتحبهم بقلبك

طيب وجيران ممكن تقول لحد انك سكنت سنه معرفتش جرنكوا شكلهم ايه وهيصدقك ايون ده بجد هما في بيت اساس حياتهم عدم الاختلاط وانا بقت نفس وجهة نظري طالما مفيش داعي اني اكلمك اكلمك ليه

طيب والاعياد لما تجي وتلاقي نفسك بتقضيها لوحدك ومش عارف تروح فين ولو رحت هتروح مع مين وتبص علي الناس وتقول ياااه كل الناس ديه مش وحيده وانا بس اللي وحيد

طيب وعيد ميلادك لما تلاقي اللي فاكره بس امك وتعدوا تحتفلوا كل سنه لوحدكوا وتقول غمه وهتروح وتجي سنه اللي بعدها وتلاقي نفسك اعد برضه لوحدك

واسوء خاطر ممكن يجي علي بالك لو امك وابوك حصلهم حاجة بعد الشر هتعيش انت ازاي حد هيسئل عليك حد هيكون بيفكر فيك ولا هتكون كانك جت الدنيا ولا كانك موجود وممكن في يوم تموت ومحدش يعرف اصلا

الوحده اسد بيهجم عليك كل شويه وكل ميقرب تبعد انت عنه فيقرب هو ويعد يقرب وانت تبعد لحد ماهتحس انه هياكلك في يوم من الايام ويخليك اثير عنده ويبقا كل شئ بتعمله من دافع وحش الوحده اللي جواك انك تكلم ناس اي ان كانوا هما مين او انك تعمل شئ مش مؤمن بيه او انك تستلم للوحده وبكده تكتئب والاكتئاب يبقا نهايتك ومرضك يكون كل سببه الاكتئاب

لازم تخالي حياتك فيها ناس لازم تخالي في علاقات مش كلها بنفس القوة لازم يكون عندك علاقات بناس كصحاب وناس كزملا وناس كناس مقربه اوي حياتك شكلها انت مش تخليها تشكلك هي لازم تخالي حياتك ع مزاجك مش تعشها مطر عليها